Mark 10

Ukuchitha Umtshado

1UJesu wasesuka kuleyondawo waya emmangweni waseJudiya langaphetsheya kweJodani. Njalo kweza kuye amaxuku abantu, kwathi njengenjayelo yakhe wabafundisa.

2Abanye abaFarisi beza bamlinga ngokumbuza bathi, “Kusemthethweni yini ukuthi indoda imale umfazi wayo na?”

3Waphendula wathi, “UMosi waliyala wathini?”

4Bathi, “UMosi wayivumela indoda ukuthi ibhale incwadi yokuchitha umtshado ibisimxotsha.”

5UJesu waphendula wathi, “Kwakungenxa yokuthi zazilukhuni izinhliziyo zenu okwenza uMosi walibhalela umthetho lo. 6Kodwa ekuqaleni kwendalo uNkulunkulu ‘wabenza indoda lomfazi.’ 7Ngalesisizatho indoda izatshiya uyise lonina imanyane lomfazi wayo,

8kuthi labo bobabili babe nyamanye. Yikho kabasebabili, sebemunye. 9Ngakho, lokho uNkulunkulu asekuhlanganisile akungehlukaniswa muntu.”

10Bathi sebengenile endlini njalo, abafundi bambuza uJesu ngalokhu. 11Waphendula wathi, “Loba ngubani olahla umfazi wakhe athathe omunye umfazi uyafeba kuye. 12Laye uma elahla indoda yakhe endele kwenye, uyafeba.”

Abantwana Abancinyane LoJesu

13Abantu babeletha abantwana abancinyane kuJesu ukuze ababeke izandla, kodwa abafundi babakhuza. 14UJesu wathi ekubona lokho wacaphuka. Wathi kubo, “Yekelani abantwana abancane beze kimi, lingabavaleli, ngokuba umbuso kaNkulunkulu ungowabanjengalaba.

15Ngilitshela iqiniso ukuthi loba ngubani ongayikwemukela umbuso kaNkulunkulu njengomntwana omncane kayikungena kuwo.” 16Wasebathatha abantwana ebaphatha, wababeka izandla wababusisa.

Ijaha Elalinothile

17UJesu wathi esesuka ehamba, indoda yagijimela kuye yafika yazilahla ngamadolo phambi kwakhe. Yabuza yathi, “Mfundisi olungileyo, ngingenzani ukuze ngizuze ilifa lokuphila kwaphakade na?”

18UJesu waphendula wathi, “Ungibizelani ngokuthi ngilungile na? Kakho olungileyo ngaphandle kukaNkulunkulu yedwa. 19Uyayazi imilayo: ‘Ungabulali, ungafebi, ungebi, ungafungeli ubufakazi bamanga, ungadlelezeli, hlonipha uyihlo lonyoko.”

20Wachaza wathi, “Mfundisi zonke lezi izinto ngiyazigcina kusukela ngisesengumfana.”

21UJesu wamkhangela wamthanda. Wathi, “Uswele into eyodwa. Hamba uyethengisa konke olakho uphe abampofu, lapho-ke uzakuba lenotho ezulwini. Ubususiza ungilandele.”

22Isizwa lokhu indoda yathelwa ngamanzi. Yasukuma yahamba isidanile ngokuba yayinothile kakhulu.

23UJesu wathalaza wasesithi kubafundi bakhe, “Kunzima okumangalisayo ukuthi isinothi singene embusweni kaNkulunkulu!”

24Abafundi bamangaliswa ngamazwi akhe lawo. Kodwa uJesu waphinde wathi, “Bantwana, kunzima kanganani ukungena embusweni kaNkulunkulu! 25Kulula ukuba ikamela lingene embotsheni yenalithi kulokuba umuntu onothileyo angene embusweni kaNkulunkulu.”

26Abafundi bamangala okwedlulayo, bathi omunye komunye, “Pho ngubani ongasindiswa na?”

27UJesu wabakhangela wathi, “Ngokwabantu kakwenzeki, kodwa hatshi ngoNkulunkulu; zonke izinto ziyenzakala ngoNkulunkulu.”

28UPhethro wathi kuye, “Sesitshiye konke ukuba sikulandele!”

29UJesu waphendula wathi, “Ngilitshela iqiniso ngithi kakho osetshiye ikhaya kumbe abafowabo, loba odadewabo, kumbe unina loba uyise, loba umntwana kumbe amasimu ngenxa yami levangeli 30ozakwehluleka ukwamukeliswa okuphindwe ngekhulu kuso lesi isikhathi samanje (amakhaya, abafowabo, odadewabo, onina, abantwana lamasimu – kwengezwe ukuhlukunyezwa) lasesikhathini esizayo, ukuphila kwaphakade. 31Kodwa abanengi abangabokuqala bazakuba ngabokucina, abokucina babe ngabokuqala.”

UJesu Ufanisa Ukufa Kwakhe Njalo

32Babesendleleni besiya eJerusalema, uJesu ekhokhele, abafundi bedidekile, kwathi labo ababelandela babesesaba. Waphinda njalo wathatha abalitshumi lambili wabadonsela eceleni wabatshela lokho okwakuzakwenzakala kuye. 33Wathi, “Siya eJerusalema, iNdodana yoMuntu izanikelwa kubaphristi abakhulu labafundisi bomthetho. Bazayigwebela ukufa bayinikele kwabeZizwe, 34abazayiyangisa bayikhafulele, bayitshaye njalo bayibulale. Ngemuva kwezinsuku ezintathu izavuka.”

Isicelo SaboJakhobe LoJohane

35Kwathi uJakhobe loJohane, amadodana kaZebedi, beza kuye. Bathi, “Mfundisi, sifuna ukuthi usenzele loba yini esiyicelayo.”

36Wababuza wathi, “Lifuna ukuthi ngilenzeleni?”

37Baphendula bathi, “Wothi omunye wethu ahlale ngakwesokunene kwakho, kuthi omunye kwesokhohlo ebukhosini bakho.”

38UJesu wathi, “Kaliyazi into eliyicelayo. Lingayinatha na inkomitshi engiyinathayo kumbe libhaphathizwe ngobhaphathizo engibhaphathizwa ngalo, na?”

39Baphendula bathi, “Singakwenza.” UJesu wathi kubo, “Lizayinatha inkomitshi engiyinathayo, libhaphathizwe ngobhaphathizo engibhaphathizwa ngalo, 40kodwa ukuthi lihlale ekunene kumbe okhohlo kwami kakusikwami ukupha lokho. Izindawo lezi ngezalabo ezilungiselwe bona.”

41Kwathi abalitshumi bekuzwa lokhu babazondela oJakhobe loJohane.

42UJesu wababizela ndawonye wathi, “Liyakwazi ukuthi labo abangababusi kwabeZizwe babaphethe kalukhuni, lezinduna zabo ezinkulu zitshengisa amandla phezu kwabo. 43Akunjalo kini. Kodwa lowo othanda ukuba mkhulu phakathi kwenu kumele abe yinceku yenu,

44lalowo ofuna ukuba ngowokuqala kabe yisigqili senu lonke. 45Ngoba leNdodana yoMuntu kayizelanga ukuzakhonzwa, kodwa ukuzakhonza, njalo ukunikela impilo yayo ibe yinhlawulo yabanengi.”

Isiphofu UBhathimewu Uvulwa Amehlo

46Basebefika eJerikho. Kwathi uJesu labafundi bakhe kanye lexuku elikhulu sebesuka edolobheni, indoda eyisiphofu, uBhathimewu (kutsho indodana kaThimewu) yayihlezi eceleni kwendlela icela. 47Yathi isizwa ukuthi kwakunguJesu waseNazaretha yanqolonga yathi, “Jesu, Ndodana kaDavida, ake ungihawukele!”

48Abanengi bayikhuza bathi kayithule, kodwa yaqhubeka yamemeza ngamandla isithi, “Ndodana kaDavida, ake ungihawukele!”

49UJesu wema wathi, “Mbizeni.” Basebeyibiza indoda eyisiphofu bathi, “Thokoza ndoda! Phakama! Uyakubiza.”

50Walahla ijazi lakhe phansi wasukuma weza kuJesu.

51UJesu wambuza wathi, “Ufuna ngikwenzeleni na?” Indoda eyisiphofu yathi, “Rabi, ngifuna ukuthi ngibone.”

52UJesu wathi, “Hamba-ke, ukukholwa kwakho sekukusilisile.” Masinyane yahle yabona yase ilandela uJesu endleleni.